Убиени 10 Палестинци во израелските воздушни напади врз Газа

ГАЗА (АА) - Најмалку десет Палестинци, меѓу кои една жена и три деца, се убиени денес, а други беа повредени во израелските воздушни напади во Појасот Газа, соопштија медицинските лица, јавува Анадолу.

Цивилната одбрана соопшти дека нејзините спасувачки тимови ги извадиле телата на седум лица убиени во израелски воздушен напад врз дом во бегалскиот камп Нусејрат во централниот дел на енклавата.

Медицински извор во болницата Ал-Авда рече дека меѓу жртвите има жена и три деца.

Во израелскиот воздушен напад целосно е уништен домот и сериозно се оштетени околните згради, изјавија очевидци за Анадолу.

Уште три лица се убиени во напад со беспилотно летало чија цел била цивилен собир северно од Рафа во јужниот дел на Газа, соопшти Цивилната одбрана.

Службата соопшти дека нејзините тимови ги извлекле телата на жртвите од областа Ариба северно од Рафа и биле пренесени во медицинскиот комплекс Насер во Кан Јунис, исто така во јужна Газа.

Израел започна геноцидна војна во Појасот Газа во која се убиени речиси 44.800 луѓе, главно жени и деца, по прекуграничниот напад на палестинската група Хамас на 7 октомври минатата година.

Минатиот месец Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.

Израел, исто така, се соочува со случај за геноцид пред Меѓународниот суд на правдата за неговата војна против Газа.