Mehmet Şah Yılmaz
14 Февруари 2025•Ажурирај: 15 Февруари 2025
АНКАРА/ИСТАНБУЛ (АА) - Турскиот министер за надворешни работи, Хакан Фидан, денес оствари средба со американскиот државен секретар Марко Рубио на која разговараше за ситуацијата во Сирија и Газа, меѓу останатите прашања, соопштија дипломатски извори, јавува Анадолу.
За време на нивната прва тет-а-тет средба, која се одржа на маргините на 61. Минхенска безбедносна конференција, Фидан ги сподели ставовите на Туркије за чекорите што земјите во регионот би можеле да ги преземат во борбата против терористичката организација ДЕАШ.
Фидан ја нагласи важноста од траен прекин на огнот во Газа и рече дека израелско-палестинскиот конфликт мора да се реши со цел да се воспостави регионален мир.
Детално стана збор и за последните случувања во врска со можноста за мир меѓу Украина и Русија.
Фидан на маргините на конференцијата реализираше и одвоени состаноци со својот британски колега Дејвид Лами и германската колешка Аналена Баербок.
На средбата со Лами, Фидан ја истакна важноста на политичкото единство на Сирија и дека треба да се поддржи сириската влада, која е на власт по падот на режимот на Асад во декември 2024 година.
Тој рече дека трајното примирје во Газа е од суштинско значење за мирот во регионот.
На средбата со Баербок, Фидан се осврна и на случувањата во врска со војната во Украина, безбедносната ситуација во Сирија како и трансатлантските односи.
