Туркије, Шведска и Финска ги започнаа преговорите за НАТО во Брисел

ИСТАНБУЛ/БРИСЕЛ (АА) - Денеска започна петтиот состанок на Постојаниот заеднички механизам меѓу Туркије, Финска и Шведска за кандидатурата на Шведска за членство во НАТО во белгискиот главен град Брисел, јавува Анадолу.

Домаќин на состанокот е генералниот секретар на НАТО, Јенс Столтенберг, а присуствуваат делегации од Туркије, Финска и Шведска.

Во турската делегација се министерот за надворешни работи Хакан Фидан, шефот на Националната разузнавачка служба Ибрахим Калин, заменик-министерот за надворешни работи Бурак Акчапар и Акиф Чагатај Килич, главен советник на претседателот Реџеп Таип Ердоган.

На состанокот се очекува да бидат разгледани чекорите преземени од Финска и Шведска, особено во борбата против тероризмот врз основа на трилатералниот договор, по средбата што се одржа во Анкара на 14 јуни.

Состанокот се одржува пред самитот на НАТО во Вилнус, Литванија на 11 и 12 јули.

Финска и Шведска аплицираа за членство во НАТО веднаш откако Русија ја започна војната во Украина во февруари 2022 година.

Иако Туркије го одобри членството на Финска во НАТО, таа чека Шведска да се придржува до трилатералниот меморандум потпишан во јуни 2022 година во Мадрид за да се решат безбедносните грижи на Анкара.

Шведска усвои антитерористички закон во ноември, надевајќи се дека Анкара ќе ја одобри кандидатурата на Стокхолм за влез во НАТО. Новиот закон, што стапи на сила од 1 јуни, им овозможува на властите да ги гонат лицата кои ги поддржуваат терористичките организации.