Турк: Израелскиот копнен напад врз Рафа не би бил во согласност со обврзувачките привремени мерки на МСП

ЖЕНЕВА (АА) - Шефот за човекови права на Обединетите нации, Волкан Турк, денес предупреди дека израелскиот напад врз Рафа нема да биде конзистентен со обврзувачките привремени мерки на Меѓународниот суд на правдата за Тел Авив, повикувајќи ги сите држави да направат „сѐ што е во нивна моќ да спречат таков исход“, јавува Анадолу.

Турк предупреди за тоа во својот говор на Интерактивниот дијалог за состојбата со човековите права на окупираната палестинска територија на 55. седница на Советот за човекови права во Женева.

„Израелски копнен напад врз Рафа ќе го доведе кошмарот што му се нанесува на населението на Газа кон нова димензија. Над 1,5 милион луѓе се засолнети во Рафа и покрај континуираното бомбардирање. Рафа стана центар за хуманитарната помош на Газа“, рече Турк.

Тој предупреди дека таквиот копнен напад ќе предизвика потенцијално „огромна загуба на животи, дополнителен ризик од злосторства, ново раселување на друга небезбедна локација и потпишување смртна пресуда за секоја надеж за ефикасна хуманитарна помош“.

„Од моја страна, не можам да видам како таквата операција би можела да биде конзистентна со обврзувачките привремени мерки издадени од Меѓународниот суд на правдата“, рече Турк и додаде: „Ги повикувам сите држави со влијание да направат сѐ што е во нивна моќ да се спречи таквиот исход.“

„Војната во Газа мора да заврши“, повика тој, истакнувајќи дека „јасните прекршувања на меѓународните човекови права и хуманитарните закони, вклучително и воените злосторства и евентуално други злосторства во рамките на меѓународното право, се извршени од сите страни“.

Со цел постигнување мир на окупираната палестинска територија и Израел, шефот за човекови права истакна дека „окупацијата мора да заврши“.

„Израелските лидери мора да го прифатат правото на Палестинците да живеат во независна држава. А сите палестински фракции мора да го признаат правото на Израел да постои во мир и безбедност“, нагласи Турк.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните дејства и да преземе мерки за гаранција дека хуманитарната помош ќе се пушти да стигне до цивилите во Газа.

Во израелските напади од 7 октомври загинаа над 30.000 Палестинци, а над 70.000 се повредени.

Израелските напади доведоа до масовно раселување и уништување и предизвикаа услови за глад во Појасот Газа.