Dildar Baykan
07 Октомври 2020•Ажурирај: 07 Октомври 2020
ВАШИНГТОН
Американскиот претседател Доналд Трамп потврди дека на институциите им дал овластување за отстранување на ознаката на тајност од документите кои се однесуваат на истрагата за Русија и на имејл-скандалот на Хилари Клинтон, неговата противкандидатка на претседателските избори 2016 година, јавува Агенција Анадолија (АА).
Откако американските медиуми објавија дека во белешките на поранешниот директор на Централната разузнавачка агенција (ЦИА), Џон Бренан, кои на Конгресот ги предаде Националната разузнавачка управа (ДНИ), се наведува дека Хилари Клинтон го спомнува планот за поврзување на Трамп со Русија, а сѐ со цел одвлекување на вниманието од нејзиниот имејл-скандал, пристигна првата реакција на американскиот претседател.
„Го одобрувам отстранувањето на ознаката за тајност од сите документи во врска со руската игра [истрага], која е најголемо политичко злосторство во историјата на САД. Исто така давам овластување за скандалот со имејлот на Хилари Клинтон. Документите нема да се уредуваат“, порача Трамп.
Американската телевизија „Фокс њуз“ (Fox News), која дојде до белешките кои директорот на Националната разузнавачка служба, Џон Ратклиф, ги претстави на Конгресот, а сѐ уште не се споделени со јавноста, објави дека Бренан го информирал поранешниот претседател Барак Обама за планот на Клинтон да го поврзе Трамп со Русија.
Во белешките е забележано дека Бренан напишал оти еден од советниците на Клинтон за надворешна политика сугерирал да се произведе скандал со цел дискредитација на Трамп, во контекст на дејствување на руските безбедносни служби во корист на Трамп, и дека Клинтон тоа го одобрила.
Во белешките на Бренан исто така се наведува дека од 28 јули 2016 година Обама побарал од него да собере докази дека постои каква било поврзаност меѓу кампањата на Трамп и Русија.
Против Клинтон е започната истрага поради користење на сопствената имејл-адреса за дипломатски работи за време на извршувањето на должност шефица на Стејт департментот.
Откако Трамп победи на изборите во ноември 2016 година, се појавија тврдења дека Русија била вклучена во американските избори во корист на Трамп.
Наводите подоцна се претворија во истрага, а пензионираниот генерал Мајкл Флајн, советникот на Трамп за национална безбедност, мораше да поднесе оставка поради наводите дека има односи со Русија.
Истрагата која ја водеше обвинителот Робер Милер откри дека Русија се обидела да интервенира на изборите, но не е утврдено дека имала влијание во корист на Трамп.
Претставничкиот дом на американскиот Конгрес во средината на декември минатата година го изгласа отповикувањето на Трамп, меѓутоа, за американскиот претседател да биде отповикан, беше потребно спроведување на судењето во Сенатот. На гласањето во Претставничкиот дом, над кој контрола имаат демократите, претходеше тримесечна истрага за обвиненијата за тоа дека Трамп вршел притисок на Украина да ги истражи неговите политички ривали и дека ги забрани американската безбедносна помош и состанок во Белата куќа. Истрагата доведе до обвиненија по две основи, за злоупотреба на позицијата и опструкција на Конгресот.
Сенатот на САД гласаше 52 наспроти 48 за ослободување на Доналд Трамп од обвиненијата за злоупотреба на позицијата. Потоа сенаторите го ослободија американскиот претседател и обвиненијата за опструкција на Конгресот со 53 наспроти 47 гласа.
