ИСТАНБУЛ (АА) – Претседателот на Соединетите Американски Држави (САД), Доналд Трамп, го нарече гувернерот на Калифорнија, Гавин Њусом, расист и ги опиша неодамнешните изјави на гувернерот од редот на демократите како „политичко самоубиство“, пренесува Анадолу.

„Интервјуто на Гавин Њускам (навредлива конотација на презимето) пред неколку недели, беше, веројатно, најсамодеструктивното интервју што некогаш сум го видел”, објави Трамп на својата платформа „Трут соушал“, мислејќи на настанот од минатиот месец пред публика во живо, каде што Њусом говореше со Андре Дикенс, градоначалникот на Атланта.

„Со еден потег, тој самиот се исклучи дури и од можноста да биде номиниран за претседателски кандидат на лудите демократи (како што беше докажано во обраќањето до нацијата)“, рече Трамп. „Афроамериканците се лути бидејќи тој очигледно е расист“.

Трамп често ги етикетира своите политички противници како расисти, особено афроамериканските политичари и обвинители, што очигледно претставува негов начин на возвраќање кон критичарите кои ги опишуваат неговите политики и реторика како расистички.

Исто така, тој го опиша минатомесечниот настан како политички самоубиствен чин, и изјави дека Њусом „веќе не е остварлив претседателски кандидат“.

Њусом нашироко се смета за силен претендент за номинација за претседател од редот на демократите во 2028 година, иако тој сѐ уште нема официјално изјавено дека ќе се кандидира. Трамп и Њусом често влегуваат во вербални пресметки на социјалните мрежи, особено преку објавите на Њусом во кои тој прави пародија на препознатливиот бомбастичен стил на претседателот.

За време на настанот во живо, Њусом се осврна на неговиот потпросечен успех на САТ-тестот (американски приемен испит за упис на универзитет), додавајќи: „Не се обидувам да ве импресионирам, туку сакам да ви укажам дека јас сум како вас, не сум подобар од вас. Јас сум човек со 960 поени на САТ-испитот и, знаете, не сакам никого да навредам... не сакам да се правам дека сум многу над вас ако сте добиле 940 поени... но буквално, јас сум човек со 960 поени на приемниот САТ-испит.“

Тој, исто така, зборуваше за неговата борба со дислексијата.

Конзервативците изјавија дека овој коментар е со расистичка конотација, претпоставувајќи дека Дикенс, кој е Афроамериканец, исто така, би имал просечен или низок резултат на приемниот САТ-испит.