АНКАРА (АА) - Царините од 50 % на индиски производи, воведени од американскиот претседател Доналд Трамп, стапија во сила денес, во време кога индискиот премиер Нарендра Моди повикува на поголема самостојност и купување домашни производи, јавува Анадолу.

Министерството за внатрешна безбедност на САД издаде нацрт-известување со детали за плановите за воведување дополнителна царина од 25 % за увоз на индиска стока, со што вкупната царина ќе достигне 50 проценти.

Царините од 25 % на увозот од Индија стапија во сила претходно овој месец, но Трамп воведе дополнителни 25 % како казна за набавката на поевтината руска сурова нафта од страна на Индија.

Во меѓувреме, се наведува дека разговорите за трговски договор се заглавени откако Индија одби да го отвори својот земјоделски пазар за американски стоки, стравувајќи дека тоа би можело да им наштети на земјоделците во земјата.

Додека растат трговските тензии меѓу двата стратешки партнера, Моди сè почесто ја нагласува потребата за самостојност и ги охрабрува граѓаните да купуваат домашни производи.

Според Канцеларијата на трговскиот претставник на САД, трговијата меѓу двете земји достигнала 129 милијарди долари во 2024 година, а Вашингтон забележал трговски дефицит од 45,7 милијарди долари.

Индиските експерти проценуваат дека новите царини можеле да влијаат на извозот вреден до 50 милијарди долари.