Трамп вели дека е постигнат „голем напредок“ за ставање крај на војната меѓу Русија и Украина по средбата со Зеленски

ИСТАНБУЛ (АА) – Американскиот претседател Доналд Трамп изјави дека е постигнат „значителен напредок“ кон завршување на војната меѓу Русија и Украина по неговата средба со украинскиот претседател Владимир Зеленски, јавува Анадолу.

„Некои би рекле дека сме покриле 95 отсто. Не знам точно колкав процент, но направивме огромен напредок кон завршување на таа војна, која секако е најсмртоносна од Втората светска војна, веројатно и најголема војна по тој период“, изјави Трамп.

Тој оцени дека преостанатите делови од мировниот план би можеле да се договорат „за неколку недели“, доколку процесот се одвива „навистина добро“.

Според Трамп, остануваат едно или две „многу трнливи прашања“, меѓу кои и прашањето за териториите што се заземени за време на конфликтот.

Американскиот претседател рече дека со рускиот претседател Владимир Путин разговарал и за повоената обнова на Украина, додавајќи дека Москва ќе помогне, „вклучително и со снабдување со енергија, електрична енергија и други работи по многу ниски цени“.

„Русија сака да ја види Украина како успешна. Претседателот Путин беше многу великодушен во своите чувства кон успехот на Украина“, рече Трамп.

Тој, исто така, изјави дека е подготвен да се обрати пред украинскиот Парламент доколку тоа помогне во унапредувањето на мировниот процес.

„Ако тоа би помогнало да се спасат 25.000 животи месечно… секако дека би бил подготвен“, рече Трамп.

Според него, можно е да се одржи и трилатерална средба меѓу него, Путин и Зеленски во „соодветен момент“.

„Го гледам тоа како можност во вистинско време“, додаде тој.

На прашањето за безбедносните гаранции за Украина, Трамп рече дека САД сакаат да соработуваат со Европа, при што „Европа ќе преземе голем дел од одговорноста“, а САД ќе ѝ помагаат.

Запрашан дали Путин се согласил на прекин на огнот за да се овозможи референдум во Украина, Трамп рече дека рускиот претседател се противи на привремено запирање на борбите доколку постои можност тие повторно да продолжат.

„Мислам дека наоѓаме начини како да го заобиколиме тоа“, додаде тој.

- 90 отсто од мировниот план од 20 точки се договорени -

Украинскиот претседател Владимир Зеленски изјави дека разговорите биле „навистина одлични“ и дека последните недели американските и украинските тимови постигнале значителен напредок.

Тој рече дека 90 отсто од мировниот план со 20 точки е веќе договорен, дека безбедносните гаранции меѓу САД и Украина се 100 отсто усогласени, додека гаранциите меѓу САД, Европа и Украина се „речиси договорени“. Воениот сегмент, според него, е целосно усогласен, а планот за просперитет е во завршна фаза.

„Разговаравме и за редоследот на следните чекори и се согласивме дека безбедносните гаранции се клучна пресвртница за постигнување траен мир“, рече Зеленски.

Тој, сепак, посочи дека претстојат тешки одлуки, нагласувајќи дека „ако планот биде многу тежок за нашето општество, тогаш општеството ќе мора да избере бидејќи тоа е нивна земја, а не земја на еден човек“.

Зеленски изјави и дека по разговорите со Трамп и европските лидери е договорено тимовите да се сретнат наредните недели за финализирање на сите прашања.

Тој додаде дека Трамп ќе биде домаќин на украински и европски лидери во Вашингтон во јануари.

Трамп го пречека Зеленски во неговата резиденција Мар-а-Лаго во Палм Бич, Флорида, каде што разговараа за американскиот план за завршување на речиси четиригодишниот конфликт. Зеленски во САД пристигна во неделата, по посетата на соседна Канада.