Сѐ поголема негативност и екстремизам: „Гардијан“ се повлекува од социјалната мрежа Х

ЛОНДОН (АА) – Британската медиумска куќа „Гардијан“ денеска соопшти дека ќе престане да објавува содржини на социјалната мрежа Х, која претходно беше позната како Твитер, јавува Анадолу.

Британскиот весник ја изрази својата загриженост за сѐ поголемата негативност и екстремизам присутни на платформата, за кои смета дека сега ги надминуваат предностите што платформата некогаш ги нудеше како алатка за споделување новинарска содржина и интеракција со публиката.

„Гардијан“ ја донесе одлуката во услови на зголемена контрола на социјалната мрежа Х, особено за време на неодамнешните претседателски избори во Соединетите Американски Држави (САД).

„Гардијан“ во образложението на својата одлука го наведе порастот на штетните содржини на мрежата Х, вклучително и екстремно десничарските теории на заговор и примери на расизам.

Британскиот весник понатаму наведува дека Х придонесува за токсична медиумска средина, со значително влијание врз политичкиот дискурс.

„Гардијан“ повеќе нема да ги користи своите официјални профили на X, но нагласи дека корисниците на платформата ќе можат и понатаму да ги споделуваат неговите написи.