Seda Sevencan
26 Декември 2023•Ажурирај: 27 Декември 2023
ИСТАНБУЛ (АА) - Специјалната известувачка на Обединетите нации (ОН) за Палестина, Франческа Албанез, денес ја осуди одлуката на Израел да ги одбие визите за персоналот на ОН, наведувајќи дека „неоснованите напади“ врз организацијата докажуваат „морален кукавичлук“, пренесува Анадолу.
„Неоснованите напади врз ОН докажуваат само морален кукавичлук. ОН се ослабени со децении од израелската неказнивост за кршењето на меѓународното право, вклучително и колонизацијата на окупираната територија и принудното раселување. ОН мора да побараат одговорност од Израел ако сакаат да ја спасат својата репутација/цел“, објави Франческа Албанез на социјалната мрежа Х како одговор на објавата на израелскиот министер за надворешни работи Ели Коен за одбивање на визите поради „лицемерието на ОН“.
„Без слобода за сите, нема да има слобода за никого“, додаде таа и повика на прекин на огнот во Газа, ослободување на израелските заложници и произволно затворените Палестинци, обнова и крај на окупацијата на палестинските територии.
Коен изјави дека нема повеќе да молчи пред лицемерието на ОН и дека наложил на Министерството за надворешни работи да не му ја продолжува визата на еден од вработените во организацијата во Израел, а на друг вработен да му го одбие барањето за виза“.
„Однесувањето на ОН од 7 октомври е срам за организацијата и меѓународната заедница“, рече тој, додавајќи дека „ќе престане да работи со оние кои соработуваат со пропагандата на терористичката организација Хамас“.
Тој го обвини генералниот секретар на ОН, Антонио Гутереш, кој го критикува Хамас, дека ги легитимира „воените злосторства и злосторствата против човештвото“, но рече дека октомврискиот напад не се случил во вакуум.
Коен рече дека комесарот за човекови права на ОН „објавува неосновани крвни клевети“ и ја нарече „UN Women“ организација која два месеци го игнорирала силувањето на израелските жени“.
Израел го нападна Појасот Газа по прекуграничниот напад на палестинската група Хамас на 7 октомври, при што загинаа најмалку 20.674 Палестинци, главно жени и деца, а беа повредени повеќе од 54.536.
Организациите за човекови права го осудија Израел за неговата воена тактика, нарекувајќи ја „колективна казна“ за 2,3 милиони жители на Газа.
