АНКАРА (АА) - Специјалната известувачка на Обединетите нации (ОН) за вонсудски и арбитрарни егзекуции, Агнес Каламард, денеска изјави дека саудискиот принц најверојатно е одговорен за хакирањето на телефонот на извршниот директор на „Амазон“, Џеф Безос.

„Компанијата [FTI Consulting], одговорна за форензичка истрага, беше екстремно темелна и цврста, затоа што таа ја изврши оваа истрага како дел од истрагата на ФБИ“, изјави Каламард за „ТРТ Ворлд“ (TRT World).

Каламард нагласи дека нејзиниот тим го разгледал извештајот со свои експерти и дошол до заклучок дека саудискиот принц Мухамед бин Селман е одговорен за хакирањето.

„Ние го добивме извештајот пред неколку месеци и во текот на изминатите неколку недели се консултиравме со нашите независни експерти, кои ги разгледаа наодите и работата на првичната форензичка истрага.“

„И тие заклучија, по разновидната размена на мислења од експерти, дека најверојатен извор на хакирањето на телефонот на г. Безос е всушност пораката на „Ватсап“, која потекнува од корисничкиот профил на „Ватсап“ на принцот на Саудиска Арабија“, изјави Каламард.

Истакнувајќи дека доставените докази се многу технички, таа рече: „Веднаш по приемот на видеодатотеката од тој кориснички профил на „Ватсап“, телефонот се однесуваше на многу поинаков начин отколку што тоа го правеше пред да ја прими таа порака и особено, податоците што се изнесени од телефонот се зголемија за илјадници проценти.“

Неколку медиуми, вклучувајќи ги „Гардијан“ (Guardian), „Фајненшал тајмс“ (Financial Times) и „Дејли бест“ (Daily Beast), во вторникот објавија дека саудискиот принц Бин Селман е одговорен за хакирањето на телефонот на Џеф Безос во мај 2018 година, кога тој му испратил видео преку апликацијата „Ватсап“, полна со шпионски програми во обид да извади податоци од телефонот на Безос.

Безос исто така е сопственик на американскиот дневен весник „Вашингтон пост“ (Washington Post), во кој убиениот новинар Џамал Кашоги пишуваше колумни кои ја критикуваат репресивната политика на Бин Селман.

Известувачите на ОН вчера соопштија дека првичните сознанија укажуваат на тоа дека Бин Селман бил вмешан во обидот за хакирање на телефонот на Безос, со цел да се уништи известувањето на „Вашингтон пост“ за Саудиска Арабија.

„Информациите што ги добивме укажуваат на можна вмешаност на принцот во набљудувањето на г. Безос, во обид да влијае, ако не и да го замолчи известувањето на „Вашингтон пост“ за Саудиска Арабија“, изјавија Каламард и Дејвид Кеј, специјален известувач за слобода на изразување.

„Наводите за хакирање на телефонот на господинот Безос, како и на други, бара итна истрага од страна на САД и другите релевантни органи, вклучително и истрага за континуираната, повеќегодишна, директна и лична вмешаност на престолонаследникот во обидите да ги препознае воочените противници“, истакнаа известувачите на ОН.

Неколку часа откако изби скандал, Американската амбасада на Саудиска Арабија на социјалната мрежа Твитер ги нарече ваквите обвинувања апсурдни.

„Повикуваме на истрага за овие тврдења, за да можеме да ги имаме сите факти“, додава Амбасадата.

Саудиските власти го направија истото по убивањето на Кашоги: итно негирање проследено со повици за истрага.

Ријад призна дека неговите агенти го убиле Кашоги, но вината ја префрли на неуспешната операција извршена без дозвола на Бин Селман. Со ваквото објаснување се подбиваа експертите кои се сомневаат во тоа дека убиството е извршено без дозвола на Бин Селман.

ЦИА со доверливост утврди дека Бин Селман го нарачал убиството на Кашоги.