Седницата на Собранието на Србија е прекината поради физички конфликт меѓу пратениците

БЕЛГРАД (АА) – Седницата на Народното собрание на Србија денес накратко беше прекината по тензиите и турканиците меѓу опозицијата и претставниците на владејачката коалиција, известува Анадолу.

Претставниците на Собранието на Србија денес расправаат за предлог-буџетот за 2025 година и за придружните закони. Покрај предлог-буџетот за следната година, на дневен ред на седницата има околу 50 точки. Седницата беше накратко прекината поради краток конфликт меѓу претставниците на владејачката коалиција и опозицијата во собраниската сала.

Претставници на владејачката коалиција и на опозицијата дојдоа на говорницата држејќи транспаренти, по што настана турканица, физичка пресметка и гаѓање со хартии и вода. Ситуацијата се смири по десетина минути кога претседателката на Собранието, Ана Брнабиќ, се симна меѓу спротивставените страни и пратениците од владејачката коалиција ги упати кон нивните места.

За време на директниот пренос можеше да се забележи дека претставниците на опозицијата станаа држејќи транспаренти на кои пишуваше „Рацете ви се крвави“ и „Корупцијата убива“, а претставниците на власта застанаа со транспаренти „Жолт џган, корупција е ваше средно име“.

До конфликт дојде и на балконот, каде што претставниците на власта закачиле транспарент со кој порачуваат „Жолтите крадци сакаат граѓанска војна, а Србија сака работа“.