САД: Ослободениот палестински активист Махдави дипломираше на Универзитетот Колумбија

АНКАРА (АА) - Мохсен Махдави, студент од палестинско потекло што во САД беше приведен, а потоа ослободен поради поддршка на Палестина, дипломираше на Универзитетот Колумбија, известува Анадолу.

Махдави присуствуваше на церемонијата на дипломирање што се одржа во кампусот на универзитетот во Њујорк.

Махдави на сцената излезе со кефија на рамо и овации од неговите пријатели, каде што му беше врачена дипломата.

Многу дипломирани студенти беа видени како носат кефија во знак на поддршка на Палестина.

„Администрацијата на Трамп сакаше да ми ја украде оваа можност. Тие сакаа да бидам в затвор, во облека на затвореник, да не се образувам и да не доживеам радост или да славам“, изјави Махдави за Асошиејтед прес (АП).

Махдави, кој изјави дека универзитетската администрација ѝ ја продала „душата“ на училиштето на администрацијата на Трамп, рече дека ги отфрлил барањата на универзитетот да му обезбедат заштита пред да биде приведен.

Махдави рече дека е охрабрен од поддршката на студентите на Универзитетот Колумбија.

- Објавени се снимки од Махмуд Халил пред приведувањето

Во меѓувреме, адвокатите на палестинскиот активист Махмуд Халил, постдипломец на Универзитетот Колумбија што ги предводеше демонстрациите за поддршка на Палестина, објавија видео на кое се прикажани моментите со нивниот клиент пред да биде приведен.

Адвокатите рекоа дека преку судско барање го добиле петминутниот безвучен материјал, избран од пет часа снимка од безбедносните камери на универзитетот.

На видеото Халил се гледа како разговара на телефон со својот адвокат и комуницира со четворица службеници на Службата за имиграција и царина (ИЦЕ) на влезот од зградата во Њујорк. На снимката се гледа и моментот кога сопругата на Халил, Нур Абдала, им ја предава зелената карта на Халил на службените лица.

Адвокатите на Халил тврдеа дека снимката докажува дека нивниот клиент не претставувал „ризик од бегство“ и дека нема причина властите да го оправдуваат неговиот притвор.

Махдави, приведен од американската Служба за имиграција и царина (ИЦЕ), беше ослободен на 30 април со судска наредба и ја опиша ситуацијата во која се наоѓаат пропалестинските студенти како „предавство на американскиот Устав“.

Палестинскиот активист Халил беше приведен на влезот на зградата на 8 март додека се враќал дома со сопругата.