Muhammet Tarhan
28 Јули 2022•Ажурирај: 29 Јули 2022
АНКАРА (АА) - Русија се спротивстави на објавувањето на изјавата на Советот за безбедност на Обединетите нации (СБОН) со која се поздравува Договорот за испорака на жито потпишан во Истанбул, пренесува Агенција Анадолија (АА).
„Норвешка и Мексико со денови работат на обединување на Советот во една порака со која се поздравува клучниот договор за повторно покренување на извозот на жито, храна и ѓубрива преку Црното Море“, рече Мона Јул, постојан претставник на Норвешка во Обединетите нации (ОН) во изјава за „Асошиејтед прес“.
Изразувајќи жалење што тоа не е реализирано, Јул рече дека заедничката изјава на Советот за безбедност на ОН за поздравување на договорот и пофалба на генералниот секретар на ОН, Антонио Гутереш, за неговите напори, може да биде важен знак.
„Норвешка верува дека се потребни лични напори и ангажман на генералниот секретар за да се олеснат преговорите меѓу страните. Овие напори се поважни од кога било, бидејќи последиците од војната сè уште се чувствуваат меѓу граѓаните на Украина и пошироко“, рече Јул.
Дипломатите од Советот за безбедност на ОН рекоа дека Русија се спротивставила на најновата нацрт-изјава за Договорот за жито бидејќи се однесува на осудата на Гутереш за воздушниот напад на Одеса на 23 јули.
„Асошиејтед прес“ вели дека изјавата предложена од Норвешка и Мексико ќе го поздрави напредокот постигнат во Договорот за извоз на жито потпишан на 22 јули.
Во изјавата ќе се пофали и генералниот секретар на ОН, Гутереш и турската Влада за нивната клучна улога во постигнувањето на договорот, и ќе се упати повик на итно исполнување на обврските.
Со посредство на Туркије и ОН, Украина и Русија во петокот во Истанбул потпишаа договор за обновување на украинската испорака на жито од пристаништата на Црното Море.
Согласно договорот, формиран е координативен центар кој ќе врши заеднички контроли на влезовите и излезите на пристаништата, обезбедувајќи ја безбедноста на рутите.
Туркије, пофалена од меѓународната заедница за нејзината посредничка улога, со Москва и Киев го координира отворањето коридор од украинскиот пристаништен град Одеса за да продолжи глобалната испорака на жито што беше запрена од Руско-украинската војна од 24 февруари.
