Русија и Украина извршија размена на тела на загинати војници

МОСКВА (АА) — Русија и Украина разменија тела на загинатите војници, изјави денес шефот на рускиот преговарачки тим во разговорите со Украина, Владимир Медински, јавува Анадолу.

„На Украина ѝ се предадени телата на 1.000 загинати украински војници. Русија ги прими телата на 35 загинати руски борци“, објави тој на Телеграм.

Претходната размена на тела меѓу Русија и Украина се случи на 29 јануари. Москва тогаш му предаде 1.000 тела на Киев, примајќи за возврат 38 загинати војници.

Како што појасни Медински, претходната размена на тела беше извршена согласно со Истанбулските договори од 2025 година.

Од почетокот на конфликтот, Москва и Киев постојано спроведуваат и размени на заробеници, вклучително и со посредство на Обединетите Арапски Емирати (ОАЕ) и САД.

Според комесарката за човекови права, Татјана Москалкова, во 2025 година, над 1.800 руски војници се вратиле од украинско заробеништво како резултат на размените.