Elena Teslova
17 Април 2025•Ажурирај: 18 Април 2025
МОСКВА (АА) - Портпаролот на Кремљ, Дмитриј Песков, денес изјави дека Русија очекува Европа и Украина на крајот да се насочат кон мирно решавање на конфликтот, но засега европските држави остануваат фокусирани на продолжување на војната, јавува Анадолу.
Говорејќи на прес-конференцијата во Москва, Песков истакна дека САД продолжуваат да соработуваат со европските партнери и со Украина за постигнување мировно решение.
„Секако, ние би сакале да видиме повеќе напори насочени кон мир и од Европа и од Украина“, рече Песков.
„За жал, она што моментно го гледаме е континуиран акцент од страна на Европа на продолжување на конфликтот“, додаде тој.
Коментирајќи ја посетата на украинската делегација на Париз, Песков изјави дека најверојатно ќе се разговара со претставници на САД и т.н. Коалиција на подготвените за различни аспекти од потенцијално мировно решение.
„Јасно е дека ќе има разговори околу украинското прашање“, посочи Песков, одговарајќи на новинарско прашање.
Претходно САД објавија дека државниот секретар Марко Рубио и специјалниот пратеник Стивен Виткоф ќе престојуваат во Париз на 17 и 18 април, каде што ќе имаат разговори со европските партнери за иднината на Украина.
Коалицијата на подготвените претходно се состана во Париз на 27 март, каде што претставници од околу 30 земји разговараа за можни безбедносни гаранции за Киев по завршувањето на конфликтот.
Меѓу темите, наводно, се разговарало за можно распоредување на мултинационален воен контингент на украинска територија.
САД не учествуваа на состанокот на кој, наводно, неколку земји изразиле подготвеност да се вклучат во мировна мисија само доколку Вашингтон ја понуди својата поддршка.
Песков потврди и дека рускиот претседател Владимир Путин неодамна имал „долг разговор“ со американскиот пратеник Стивен Виткоф во Санкт Петербург на 11 април. Содржината на разговорот, како што истакна Песков, му била пренесена на американскиот претседател Доналд Трамп.
„Неодамна имавме многу долг разговор со господин Виткоф и знаеме дека содржината од разговорот му е пренесена на претседателот Трамп“, изјави Песков.
Тој прецизираше дека можноста за идна средба меѓу Путин и Трамп не била тема во разговорот.
