Русија бара итно одржување седница на Советот за безбедност на Обединетите нации за ситуацијата во Авганистан

МОСКВА

Специјалниот пратеник на рускиот претседател Владимир Путин за Авганистан, Замир Кабулов, изјави дека Советот за безбедност на ОН треба итно да заседава за да дискутира за ситуацијата во Авганистан, пренесува Агенција Анадолија (АА).

Кабулов за руската новинска агенција РИА зборуваше за најновите случувања во Авганистан.

Тој истакна дека Советот за безбедност на ОН треба итно да заседава со цел да дискутира за ситуацијата во Авганистан.

„Работиме на тоа прашање. Нашите колеги се силно заинтересирани, но тоа не ја менува ситуацијата. Требаше порано да размислуваме за тоа наместо сега да одржуваме седница“, рече Кабулов.

Споменувајќи дека руската Амбасада во Кабул нема да биде евакуирана од Авганистан, Кабулов изјави дека талибанците гарантираат безбедност за нивната дипломатска мисија во земјата.

Министерството за внатрешни работи на Авганистан соопшти дека по влегувањето на талибанците во Кабул почнуваат преговорите за мирно предавање на власта.

Вршителот на должноста министер за внатрешни работи на Авганистан, Абдул Сетар Мирзаквал, на социјалната мрежа Твитер објави видеопорака во која рече дека Кабул нема да биде нападнат по влегувањето на талибанците, туку дека ќе се одржат преговори за предавање на власта.

„Во својство на шеф на Министерството им наредив на сите сили и понатаму да го одржуваат редот и безбедноста во Кабул. Нашиот народ не треба да се грижи, во градот нема да има безбедносни проблеми“, рече Мирзаквал.