ЛОНДОН (АА) - Британскиот премиер Риши Сунак изјави дека „значителната ескалација“ на Блискиот Исток не е во ничиј интерес, додавајќи дека сакаат да видат како завладува мир, јавува Анадолу.

Сунак ги даде овие изјави за време на неговото обраќање на настан во Лондон по пријавениот израелски напад врз Иран, при кој силни експлозии се слушнале во најмалку два ирански града утринава.

Запрашан за неговиот одговор на пријавените израелски напади врз Иран, Сунак рече дека тоа е ситуација во развој, па затоа „не би било правилно да шпекулира додека фактите не станат појасни“.

„Работиме на потврдување на деталите заедно со сојузниците“, истакна британскиот премиер.

Повторувајќи дека Велика Британија ги осудила одмаздничките напади на Иран во саботата против Израел, тој рече дека Израел „апсолутно има право на самоодбрана“.

„Но, како што му кажав на (израелскиот) премиер Нетанјаху кога разговарав со него минатата недела, и генерално, значителната ескалација не е во ничиј интерес“, истакна Сунак.

Тој додаде: „Она што сакаме да го видиме е да завладее мир низ регионот.“

Експлозиите во Иран се случија во време на засилени тензии меѓу најголемите непријатели Иран и Израел по саботниот напад на Техеран со стотици проектили и беспилотни летала врз Израел, за кој Иран рече дека е одговор на нападот на 1 април врз иранскиот Конзулат во Сирија.

Израел вети воен одговор за иранскиот напад и покрај тоа што многу западни земји повикаа на воздржаност и деескалација на тензиите.

Велика Британија вчера објави дека во координиран пакет со САД вовеле нови санкции за највисоките ирански воени претставници, вклучително и за Генералштабот на вооружените сили.