ИСТАНБУЛ (АА) – Американскиот претседател Доналд Трамп „може да започне војна, но не може да контролира како ќе заврши“, изјави претседателот на иранскиот Парламент, нагласувајќи дека Техеран останува отворен за преговори „само доколку тие се реални, а не наметнати со сила“, пренесува Анадолу.

„Подготвени сме за преговори“, рече Мухамад Багер Галибаф во интервју за „Си-ен-ен“ доцна синоќа, додавајќи: „Но не веруваме дека тоа е видот на дијалог што американскиот претседател го бара“.

Тој го обвини Вашингтон дека ја поткопува дипломатијата преку употреба на сила, наведувајќи дека САД „ја бомбардирале преговарачката маса два дена пред шестата рунда преговори со Иран“.

Галибаф истакна дека Иран нема да влезе во преговори без конкретни придобивки, нагласувајќи: „Сè додека не бидат гарантирани економските интереси на иранскиот народ, нема да има преговори“, додавајќи: „Диктатот не го сметаме за преговарање“.

Тој предупреди и дека разговорите што се водат под воен притисок само ги влошуваат тензиите.

„Преговорите во сенка на војна ги разгоруваат тензиите“, рече Галибаф.

„Доколку Трамп сака Нобелова награда за мир, треба да се дистанцира од оние кои поттикнуваат војна и од оние што заговараат капитулација околу него“, додаде тој.

Овие изјави следуваат по најновата изјава на Трамп дека „масивна армада“ се движи кон Иран, како и по неговиот повик Техеран да „седне на маса“ за преговори.

Иранските власти одговорија со предупредувања за можен конфликт и одмазда, истовремено повторувајќи дека остануваат отворени за разговори само под, како што наведуваат, фер и ненаметливи услови.

Во меѓувреме, Иран е погоден од бран протести од 28 декември, кои започнаа во Техеран поради наглото слабеење на иранскиот ријал и влошената економска состојба. Подоцна, демонстрациите се проширија и во други градови.

Властите ги обвинија САД и Израел дека стојат зад „вооружените немири“ со цел создавање изговор за странска интервенција и предупредија дека секој американски напад ќе предизвика „брз и сеопфатен“ одговор.