Почина и новороденчето извадено од утробата на Палестинка убиена во израелски напад врз Газа

ГАЗА (АА) - Почина и новороденчето извадено од утробата на Палестинка убиена во израелски напад врз јужниот дел на Појасот Газа, соопштија медицинските служби, јавува Анадолу.

Палестинската Црвена полумесечина информираше дека медицински екипи во болницата „Ал-Маваси“ го извадиле бебето, по нападот што израелската армија го извршила врз куќа во западниот дел на Хан Јунис денес.

Новороденчето во критична состојба било однесено на одделението за интензивна нега во болницата Насер.

И покрај сите напори на медицинскиот персонал, бебето починало неколку часа подоцна.

Мајката е убиена во израелски напад врз куќа во Ал-Маваси во западен Хан​​​​​​​ Јунис денес.

Израелската армија ги обнови своите воздушни напади низ Појасот Газа денес, при што се убиени најмалку 50 лица, а десетици беа повредени.

Израел применува блокада на Газа веќе 18 години, а од 2 март ги затвори сите премини, со што се влошија хуманитарните услови во енклавата.

И покрај меѓународните повици за прекин на огнот, израелската армија води интензивна офанзива во Газа од 7 октомври 2023 година, при што се убиени речиси 60.000 Палестинци, најголем дел од нив жени и деца.

Немилосрдното бомбардирање ја уништи енклавата и доведе до недостиг на храна.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел е обвинет за геноцид во Меѓународниот суд на правдата за својата војна во енклавата.