Потрагата по десетици исчезнати во свлечиштата во Индонезија продолжува, билансот на загинати порасна на 38

ИСТАНБУЛ (АА) – Бројот на жртви од свлечиштето во Индонезија се искачи на 38, а продолжуваат операциите за пребарување и спасување на десетици лица кои се пријавени како исчезнати во Западна Јава, јавија денес државните медиуми, пренесува Анадолу.

Екипите за пребарување и спасување пронајдоа уште четири тела на местото на катастрофата, објави новинската агенција Антара, повикувајќи се на локални претставници.

Надлежните досега идентификуваа 20 тела и ги предадоа на нивните семејства. Официјалните лица изјавија дека околу 61 лице сè уште се водат како исчезнати.

Националната агенција за управување со катастрофи соопшти дека операциите за пребарување и спасување продолжиле денес, со вклученост на околу 800 лица.

Катастрофата предизвика раселување на најмалку 685 лица, кои се преместени во побезбедни области.

Вчера, началникот на Генералштабот на индонезиската морнарица, Мухамед Али, изјави дека 23 војници биле закопани под свлечиштето за време на обука во областа. За четворица е потврдено дека се загинати, додека 19 сè уште се водат како исчезнати.

Свлечиштето погоди село во регентството Западен Бандунг во саботата, закопувајќи десетици домови под кал и други остатоци.

Спасувачките операции се во тек во погодената област, која се карактеризира со тежок терен, додека временските прогнози предупредуваат на умерени до многу обилни врнежи од дожд во наредните денови, што ќе ги усложни операциите.