Полска се согласи системите „Патриот“ да ги држи близу границата со Украина до крајот на годината

АНКАРА (АА) - Полска го прифати германскиот предлог да ги држи системите за противвоздушна одбрана „Патриот“ во близина на нејзината граница со Украина најмалку до крајот на 2023 година, пренесува Анадолу.

Полските батерии „Патриот“ ќе бидат интегрирани со полскиот систем за противвоздушна и противракетна одбрана, изјави денес министерот за одбрана, Мариуш Блашчак, за полската радиопрограма, јави државната новинска агенција ПАП.

Варшава минатиот месец побара продолжување на распоредувањето на германските батерии „Патриот“ во близина на нејзината граница со Украина барем до крајот на годината.

Германија испрати батерии „Патриот“ во Полска во јануари, откако две лица го загубија животот во ноември минатата година кога украински проектил падна во Полска, околу девет месеци од почетокот на војната во Украина.

Првично, германските батерии „Патриот“ беа стационирани само во источниот град Замошк до крајот на јуни.

Системите „Патриот“ се еден од најмодерните системи за противвоздушна одбрана. Тие можат да се спротивстават на непријателски авиони, балистички ракети и крстoсувачки ракети од далечина од околу 100 километри.