Emre Gürkan Abay
11 Ноември 2021•Ажурирај: 12 Ноември 2021
МОСКВА (АА) – Претседателот на Белорусија, Александар Лукашенко, порача дека Западот треба да размисли за испораката на природен гас во Европа преку Белорусија пред да воведе санкции кон Белорусија, јавува Агенција Анадолија (АА).
„Ние ја затоплуваме Европа, а тие сѐ уште ни се закануваат дека ќе ја затворат границата. Што ќе се случи ако го исклучиме природниот гас?“, праша Лукашенко.
Тој, на седницата на Владата која се одржа во главниот град Минск, се осврна на мигрантската криза на белоруската граница со Полска.
Објаснувајќи дека има обиди за испорака на оружје до мигрантите од Донбас во источна Украина, Лукашенко рече: „Што ќе направат со оружјето? Тие се обидуваат да провоцираат. Сакаат да ги доведат нашите војници и војски едни против други. Затоа, мора да го спречиме снабдувањето со оружје на мигрантите со одржување на контрола околу нашата граница.“
Лукашенко рече дека и активностите на НАТО и полските војски на границата со Белорусија треба да бидат следени внимателно. „15.000 војници, тенкови, оклопни возила, хеликоптери и авиони арогантно ги повлекоа до нашата граница без никакво предупредување. Мораме да го видиме ова и да подготвиме контраплан.“
Во својот говор, Лукашенко се осврна и на подготовките на Европската Унија за санкции против Белорусија.
„Што ќе се случи ако ги затвориме премините [транспортните премини] преку Белорусија? Од Украина не може да се помине затоа што границата со Русија е затворена. Нема патишта ниту до балтичките земји. Гасоводот „Јамал - Европа“, исто така минува низ Белорусија. Волуменот на рускиот гас што оди на Запад преку оваа рута значително се зголеми. Ја затоплуваме Европа, а таа сѐ уште ни се заканува дека ќе ја затвори границата. Што ќе се случи ако го исклучиме природниот гас?“
Меѓу другото, Лукашенко додаде дека белоруските власти треба да им помогнат на мигрантите на границата, особено на жените и децата.
