Пентагон: САД немаат план да пратат воени обучувачи во Украина

ВАШИНГТОН (АА) - САД засега не планираат да пратат воени обучувачи во Украина, изјави вчера заменик-секретарката за печат на Пентагон, Сабрина Синг, јавува Анадолу.

„Не, според моите сознанија“, изјави Синг за новинарите кога беше прашана дали САД во моментов планираат да пратат американски воени обучувачи во Украина.

„Ние ги обучуваме Украинците. Обучивме илјадници и илјадници војници како дел од нашата долгорочна посветеност на Украина, но немам информации дека праќаме обучувачи во Украина во овој момент“, додаде таа.

Претседателот на Здружените началници на Генералштабот, генерал Чарлс К. Браун, вчера изјави дека распоредувањето на обучувачи на НАТО се чини „неизбежно“, додавајќи: „Ќе стигнеме таму на крајот, со текот на времето.“

Синг рече дека не знаела за неговите коментари.

Откако започна руско-украинската војна во 2022 година, САД му обезбедија воена помош на Киев.

Неодамна, за време на посетата на главниот град Киев, американскиот државен секретар Ентони Блинкен објави дека САД ќе обезбедат дополнителни 2 милијарди долари воена помош за Украина.

Минатата недела САД објавија нов пакет воена помош од 400 милиони долари за Украина, што ја означи третата транша од помошта откако Конгресот го усвои дополнителното финансирање кон крајот на април.

Неколку минути откако претседателот Џо Бајден го потпиша законот за трошење од 95 милијарди долари со кој се финансираат неговите врвни приоритети за национална безбедност, вклучително и повеќе од 60,8 милијарди долари за Украина, Пентагон објави пакет од 1 милијарда долари за Украина.

Потоа следуваше најава за „историски“ долгорочен инвестициски пакет од 6 милијарди долари за набавка на нова опрема за Украина.