Emre Gürkan Abay
25 Јануари 2022•Ажурирај: 26 Јануари 2022
ЕРЕВАН (АА) - Ерменскиот премиер Никол Пашинјан изјави дека неговата земја најверојатно ќе присуствува на овогодинешниот Дипломатски форум во Анталија, јужна Турција, јавува Агенција Анадолија (АА).
Говорејќи на виртуелната прес-конференција, Пашинјан го спомена почетокот на разговорите за нормализација на односите меѓу Ерменија и Турција, велејќи дека би било неразумно да се пропушти можноста за дијалог.
„Доколку процесот продолжи, постои голема веројатност Ерменија да ја прифати поканата да учествува на настанот“, рече тој.
Годишниот форум ќе се одржи од 11 до 13 март со тема „Прекодирање на дипломатијата“.
Турција и Ерменија долго време имаат различни ставови поради голем број прашања, од одбивањето на Ерменија да ја признае нивната заедничка граница до историските инциденти со ерменското население на Османлиското Царство во 1915 година, за време на Првата светска војна.
Во текот на изминатата година, Анкара постојано го повикуваше Ереван да го провери својот непријателски пристап и да работи за регионален мир.
Првата средба на специјалните претставници од двете земји се одржа на 14 јануари во руската престолнина Москва.
Според соопштението на турското Министерство за надворешни работи, двете страни ги размениле своите првични ставови во врска со процесот во позитивна и конструктивна атмосфера и се согласиле да ги продолжат преговорите без предуслови, со цел потполна нормализација.
Пашинјан изрази надеж и за мировен договор со Азербејџан, со кој Ерменија имаше 44-дневен конфликт околу Карабах кон крајот на 2020 година.
До моментот кога договорот постигнат со посредство на Русија ги прекина борбите, Баку ослободи неколку градови и 300 населби и села што беа окупирани од Ерменија речиси 30 години.
