Ekip
22 Јуни 2022•Ажурирај: 23 Јуни 2022
БРИСЕЛ (АА) - Лидерите на Европската Унија (ЕУ) се очекува да го одобрат кандидатскиот статус на Украина и Молдавија на претстојниот дводневен Самит, изјави денеска официјален претставник на ЕУ, јавува Агенција Анадолија (АА).
„Очекуваме европските лидери да им доделат кандидатски статус на Украина и Молдавија“, изјави претставникот, кој сакаше да остане анонимен, за новинарите пред Самитот.
Самитот ЕУ - Западен Балкан треба да започне утре (четврток) наутро со присуство на шефовите на држави и влади на ЕУ, како и на лидерите од Северна Македонија, Србија, Црна Гора, Косово, Албанија и Босна и Херцеговина.
„Разговорите ќе се фокусираат на можните реформи во процесот на проширување на ЕУ со цел да се олесни интеграцијата на земјите од Западен Балкан“, рече претставникот на ЕУ.
„Напредок во отпочнувањето на пристапните преговори со Северна Македонија, исто така, може да се случи откако Франција подготви компромис“, изјави изворот, додавајќи дека изгледите за конечен договор зависат од тоа како ќе се одвива политичката криза во Бугарија, која досега ги блокира преговорите.
Како најважна тема на „геополитичкиот самит“ се очекува да биде давањето зелено светло од лидерите на ЕУ за кандидатурите на Украина и Молдавија.
„Тие, исто така, најверојатно ќе доделат кандидатски статус и на Грузија под одредени услови, а од [Европската] комисија ќе биде побарано да известува за напредокот во подоцнежната фаза“, објасни претставникот на ЕУ.
Лидерите на ЕУ ќе се осврнат и на можноста за дополнителни санкции против Русија и поддршка за Украина, како и на решенија за глобалниот недостиг на храна.
В петок Самитот ќе продолжи со разговори за резултатите од Конференцијата за Европа и за економијата, меѓу кои и за инфлацијата и растот на цените на енергијата.
