Diyar Güldoğan
21 Ноември 2025•Ажурирај: 23 Ноември 2025
ВАШИНГТОН (АА) - ОН денес предупредија за влошување на условите во окупираниот Западен Брег, известувајќи за бран на насилства што ги остави палестинските цивили да се соочат со зголемен број жртви, раселување и несигурност, известува Анадолу.
„Осврнувајќи се кон Западниот Брег, нашите хуманитарни колеги предупредија дека нивото на насилство таму е длабоко загрижувачко, со жртви, материјална штета, раселување, губење на средства за живот и силно чувство на несигурност за палестинските цивили“, изјави за новинарите портпаролот на ОН, Стефан Дужарик.
Оваа недела, Дужарик изјави дека бројот на убиени палестински деца во 2025 година достигнал 50.
„Вкупно, повеќе од 200 Палестинци се убиени од страна на израелските сили од почетокот на годината“, рече тој и додаде дека за само една недела Канцеларијата за координација на хуманитарни работи (OCHA) документирала 29 напади на нелегалните израелски доселеници што доведоа до 11 повредени и оштетување на 10 домови, две џамии, речиси дваесетина возила и земјоделски средства.
„Продолжуваме да повикуваме на заштита на цивилите – што вклучува спроведување на законот против секој што врши напади – и смртоносната сила да се користи од страна на безбедносните сили само во строга согласност со меѓународно признатите стандарди за спроведување на законот.
„Тактиките слични на војна не смеат да се толерираат како нова нормалност (на Западниот Брег)“, рече тој.
Кога беше запрашан за израелските планови за запленување големи делови од историскиот локалитет Себастија на Западниот Брег, Дужарик рече дека ОН во весниците ги виделе информациите за намерата.
„Мислам дека бевме многу јасни во нашето противење на запленувањето земјиште по ова прашање“, додаде тој.
Израелската Армија ги ескалираше нападите на Западниот Брег од почетокот на војната во Појасот Газа во октомври 2023 година.
Повеќе од 1.076 Палестинци оттогаш се убиени, а 10.700 се повредени во нападите на Армијата и нелегалните доселеници на окупираната територија. Приведени се и повеќе од 20.500 луѓе.
Во значајно мислење објавено минатиот јули, Меѓународниот суд на правдата ја прогласи израелската окупација на палестинската територија за нелегална и повика на евакуација на сите населби на Западниот Брег и во Источен Ерусалим.
