Ekip
05 Мај 2022•Ажурирај: 06 Мај 2022
ЖЕНЕВА (АА) - Завршена е новата операција за безбеден премин за евакуирање на 300 цивили заглавени во Мариупол и во други области во Украина, каде што многумина од нив останаа само со облеката што ја носеа, соопштија Обединетите нации (ОН), пренесува Агенција Анадолија (АА).
„Над 300 цивили од Мариупол, Манхуш, Бердианск, Токмак и Василивка сега добиваат хуманитарна помош во Запорожје“, рече хуманитарниот координатор на ОН за Украина, Оснат Лубрани.
„Многу од нив дојдоа без ништо друго, освен со облеката што ја носеа, а ние сега ќе ги поддржиме во овие тешки времиња, вклучително и со многу потребната психолошка поддршка“, рече Лубрани.
Официјалниот претставник на ОН истакна дека иако оваа втора евакуација на цивили од областите во Мариупол и пошироко е значајна, мора да се направи повеќе за да се осигура дека сите цивили заглавени во борбите можат да заминат во насока каде што сакаат.
„Нашата работа со страните за гаранција на безбеден премин на цивилите ќе продолжи“, нагласи Лубрани.
Операцијата за безбеден премин координирана од Меѓународниот комитет на Црвениот крст (ICRC), страните во конфликтот и ОН обезбеди неколку десетици цивили да заминат од металуршката фабрика „Азовстал“ во Мариупол и да стигнат во Запорожје за време на петдневната операција за безбеден премин.
Војната која влијаеше на секој аспект од цивилниот живот откако Русија започна со нападите на 24 февруари продолжи во средата со изјавата на шефот на Светската здравствена организација (СЗО), Тедрос Гебрејесус, дека СЗО сега потврдила 186 напади врз здравствената заштита во Украина.
„Голем број цивили можеа да го напуштат Мариупол вчера и СЗО и нашите партнери беа во можност да ги примат и да обезбедат здравствена заштита“, рече Тедрос.
„Хуманитарните коридори како овој се критични во доведувањето на цивилите до безбедносни и здравствени услуги на оние кои се во потреба. Ја повикуваме Руската Федерација да им дозволи на луѓето да го напуштат Мариупол и другите области каде што цивилите се изложени на голем ризик. Ќе продолжиме да ја повикуваме Руската Федерација да стави крај на војната“, нагласи тој.
Канцеларијата за човекови права во последната изјава потврди дека бројот на цивилни жртви во војната во Украина од 24 февруари е 3.238, а 3.397 се повредени, но ОН забележаа дека вистинската бројка е значително поголема.
