ОН: „Војната на Израел против Газа им пркоси на пристојноста, човечноста и законот“

ХАМИЛТОН (АА) - Висок функционер на Обединетите нации (ОН) денес ја осуди израелската војна во Газа, нарекувајќи ја „војна без граници“ бидејќи хуманитарните работници и понатаму се цел на нападите, јавува Анадолу.

Осврнувајќи се на израелското убиство на 15 хуманитарни работници чии тела беа откриени во масовна гробница во Појасот Газа, Џонатан Витал, висок офицер за хуманитарни прашања во Канцеларијата на ОН за координација на хуманитарните прашања (OCHA) на окупираната палестинска територија, на виртуелната прес-конференција истакна: „Убиени се додека се обидувале да спасат животи.“

„Започнувам со овој конкретен случај затоа што мислам дека е многу симболичен за точката до која дојдовме во Газа. Она што се случува тука ѝ пркоси на пристојноста, ѝ пркоси на човечноста, му пркоси на законот. Навистина тоа е војна без граници“, рече тој.

Истакнувајќи ја страшната ситуација, тој рече дека „од денес 64 % од Газа се под наредба за активно присилно раселување или се во таканаречената тампон-зона“.

Витал предупреди дека „никаде и никој не е безбеден во Газа“ бидејќи жртвите се бомбардираат додека трагаат по храна, а уништени се складишта за хуманитарни цели.

Тој ги отфрли тврдењата на Израел дека Газа има доволно храна.

„Резервите буквално беа доставени ‘капка по капка’ во енклавата“, рече Витал.

„Нема хуманитарни решенија за кризата“, нагласи тој, повикувајќи на политичка акција и одговорност.

И покрај уништувањето, тој истакна дека Палестинците сѐ уште имаат надеж.

„Надежта во Газа умира последна“, рече Витал, повикувајќи ги нациите да го спроведат меѓународното право и да се залагаат за прекин на огнот.