Нубиските пирамиди во Судан гордо стојат во пустината и покрај конфликтите и занемареноста

ПОРТ СУДАН (АА) - Во источната африканска земја Судан, каде што има конфликти, 2000-годишните нубиски пирамиди (Пирамиди во Меро), заштитени од УНЕСКО, сè уште гордо стојат во пустината, преживувајќи војни и занемареност, додека сведочат за историјата, јавува Анадолу.

Конфликтот помеѓу суданската Армија и паравоените Сили за брза поддршка (РСФ), особено во главниот град Картум и останатите региони, предизвика огромна штета врз инфраструктурата, економијата, образованието и здравството.

Конфликтот во кој се убиени 20.000 лица, речиси 9 милиони лица се раселени во рамките на Судан и повеќе од три милиони побегнале од земјата, исто така го погоди и туристичкиот сектор.

Анадолу ја долови убавината на пирамидите, лоцирани на околу 200 километри северно од Картум, кои некогаш беа голема туристичка атракција пред граѓанската војна.

Пирамидите кај античкиот град Меро, познати како пирамидите „Беџравија“, наречени според селото во близина, се постари 800 години од познатите египетски пирамиди. Иако се помали по големина, нивниот број е значително поголем.

- Тековниот конфликт ги одврати туристите од посета на пирамидите

Мештаните од селото Беџравија, кои во минатото ги водеа туристите на патувања со камили и продаваа локални сувенири, денес се соочуваат со замрен туризам поради воениот конфликт.

Жителите, разочарани од недостатокот на признание за пирамидите, апелираат светот да ги открие овие скриени богатства.

Некои пирамиди се оштетени или несоодветно реставрирани поради природни и човечки фактори, додека тековниот конфликт, економските проблеми и политичката нестабилност го спречуваат нивното соодветно одржување.

Дополнителна штета во регионот била предизвикана во 19 век од ископувањата на европските археолози, особено од италијанскиот ловец на богатства и истражувач Џузепе Ферлини.