Ahmed Asmar
28 Април 2025•Ажурирај: 29 Април 2025
АНКАРА (АА) – Најмалку 68 лица загинаа, а 47 други се повредени во американските воздушни напади врз засолниште за африкански мигранти во северната покраина Сада во Јемен, соопштија денес Хусите, јавува Анадолу.
Министерството за внатрешни работи, предводено од Хусите, соопшти дека нападите биле насочени кон прифатен центар во кој биле сместени 115 африкански мигранти.
Во соопштението се вели дека засолништето било надгледувано од Меѓународната организација за миграција (ИОМ) и Меѓународниот комитет на Црвениот крст (МКЦР), нарекувајќи ги американските напади „потполно воено злосторство“.
Телевизијата „Ал Масира“, предводена од Хусите, објави снимки на кои се гледа дека е направена голема штета на бомбардираното место, како и евакуациите на повредените лица во болници.
Според медиумот, една од американските ракети не експлодирала и со неа се справуваат тимови експерти.
Нема коментар од САД за јавувањата.
САД извршија повеќе од 1.200 воздушни напади во Јемен од 15 март, при што се убиени над 225 цивили, а повредени се над 430, претежно жени и деца, според податоците на Хусите, кои ги исклучуваат загубите меѓу нивните сили.
Американскиот претседател Доналд Трамп минатиот месец изјави дека наредил „решителна и моќна воена акција“ против групата Хуси, а подоцна се закани дека „целосно ќе ги уништи“.
Хусите ги напаѓаат бродовите што минуваат низ Црвеното и Арапското Море, теснецот Баб ал-Мандаб и Аденскиот Залив од ноември 2023 година во знак на солидарност со Палестинците во Појасот Газа, каде што повеќе од 52.000 луѓе се убиени во бруталниот израелски напад што трае повеќе од 19 месеци.
Групата ги прекина нападите кога во јануари беше прогласено примирје во Газа меѓу Израел и палестинската група на отпорот Хамас, но ги продолжи откако Израел ги обнови воздушните напади врз Газа минатиот месец.
