Zylfije Adem Jakupi
12 Април 2023•Ажурирај: 13 Април 2023
ПРИШТИНА (АА) - Во врска со ранувањето на државјанин од српска националност од страна на полицаец во понеделникот вечерта на северот на Косово, министерката за правда Албулена Хаџију изјави дека косовската полиција извршила извонредна работа со цел да се расветлат причините и околностите на овој случај, јавува Анадолу.
На прес-конференцијата по седницата на Владата на Косово, Хаџију истакна дека косовската полиција треба да им обезбеди заштита на сите граѓани без разлика на нивната етничка припадност.
Таа го осуди инцидентот и изјави дека еден полицаец се товари за обид за убиство, а тројца други за непријавување кривично дело.
„Сигурно е дека го осудуваме тој случај. Како што рече и министерот за внатрешни работи и како што знаете, четворица полицајци се суспендирани од страна на надлежните институции и сите четворица полицајци се во притвор“, му рече таа на Хаџи.
Министерката ги повика правосудните органи да го третираат овој случај сериозно и одговорно.
Министерот за внатрешни работи на Косово, Џељаљ Свецла, ја информираше јавноста за апсењето на четворицата полицајци. Во објава на Фејсбук наведе дека, според првичните истраги, откако полицаецот дал знак да застане, возачот не застанал туку продолжил во правец кон Звечани. Потоа полицискиот службеник со пиштол испукал кон автомобилот при што го повредил државјанинот М.Ј.
Во врска со претстојните вонредни избори во четири општини на северот на Косово, министерката Хаџиу рече дека безбедносните институции и Централната изборна комисија треба да ја проценат безбедносната состојба, а потоа Владата ќе донесе одлука за изборите.
„Во моментот кога ќе имаме информација дали треба да се одржат или не изборите, ќе дадеме свое мислење“, рече Хаџиу.
Во пресрет на вонредните локални избори во Северна Митровица, Звечан, Лепосавиќ и Зубин Поток закажани за 23 април, инцидентите се зачестени.
Инаку, Централната изборна комисија на Косово денес повторно го одложи состанокот на кој треба да се разгледува процената на ризикот за гласање за вонредните локални избори во општините на север.
ЦИК, исто така, сѐ уште го нема одобрено списокот со избирачки места што ќе бидат отворени за овие избори.
Српска листа, најголемата партија на косовските Срби, поддржана од официјален Белград, не се пријави на изборите во април, со образложение дека не се исполнети нејзините услови.
Вонредните избори се распишани првично за декември минатата година, но беа поместени за април поради лошата безбедносна ситуација.
Изборите беа распишани откако градоначалниците и општинските советници од Српска листа ги напуштија косовските институции во знак на протест поради одлуката на Владата на Косово за задолжителна пререгистрација на возилата од стари српски (КМ) во РКС таблички.
Србите тогаш ја напуштија Полицијата на Косово и косовските правосудни институции, а оттогаш специјалните единици на косовската полиција се присутни на северот на Косово, каде што живее мнозинско српско население.
