Ekip
10 Септември 2021•Ажурирај: 11 Септември 2021
РАБАТ (АА) - Раководството на мароканската Партија за правда и развој колективно поднесе оставка по неуспехот на партијата на парламентарните избори во земјата, пренесува Агенција Анадолија (АА).
Во соопштението, партијата, која ја предводеше коалициската Влада, рече дека ќе премине во опозиција.
Се наведува и дека премиерот на земјата, Саад-Един ел Османи, го напуштил раководството на партијата заедно со останатите членови на раководството.
Во соопштението се повикува на одржување итен состанок на 18 септември на Националниот совет на партијата за да се донесат соодветни одлуки и да се оценат изборните резултати.
Во него се додава дека резултатите од парламентарните избори се „неразбирливи и нелогични“ и не ја одразуваат реалноста на позицијата на партијата на политичката карта на Мароко.
Според прелиминарните резултати од парламентарните избори во Мароко во средата, либералниот Национален сојуз на независните излезе како победничка партија со 97 места во Парламентот кој брои 395 места, додека владејачката Партија за правда и развој падна на осмото место со само 12 освоени места.
Во 2016 година, Партијата за правда и развој ја предводеше коалициската Влада, откако на парламентарните избори освои најмногу пратенички места (125).
