Лидерот на Хамас, Ханије, изрази задоволство за поддршката на Катар за обнова на Газа

ГАЗА (АА) - Претседателот на политичкото биро на Хамас, Исмаил Ханије, изрази задоволство за поддршката на Катар за обнова на Појасот Газа, кој беше сериозно оштетен од израелските напади, пренесува Агенција Анадолија (АА).

Во писменото соопштение Ханије ја пренесе искрената благодарност до катарскиот емир, шеикот Тамим бин Хамад ал Тани, кој реши да даде 500 милиони долари за да придонесе за обновата на Газа.

Истакнувајќи дека овој став на поддршка го рефлектира благородништвото на Катар што секогаш е покрај палестинскиот народ, Ханије особено ја пофали континуираната поддршка што ја дава Катар на регионот, особено за време на блокадата.

Катарскиот министер за надворешни работи, Мухамед бин Абдурахман ал Тани, вчера соопшти дека неговата земја ќе даде поддршка од 500 милиони долари за обнова на Газа, по наредба на емирот на Катар.

Комитетот за обнова на Газа, предводен од Мухамед ел Имади, поврзан со Министерството за надворешни работи на Катар, игра голема улога во спроведувањето на проектите кои ги ублажуваат ефектите од блокадата која трае со години.

Египетскиот претседател Абдулфетах ал Сиси исто така најави дека ќе бидат обезбедени 500 милиони долари за обновата на Газа, која беше сериозно оштетена од израелските напади.

Израел и Хамас, со посредство на Египет, на 21 мај договорија прекин на огнот, со што се стави крај на израелските напади врз Газа што започнаа на 10 мај.

Во израелските напади врз Појасот Газа досега загинаа 254 Палестинци, од кои 66 деца и 39 жени, а повредени се 1.948 лица. Исто така, илјадници домови се потполно уништени или во голема мера оштетени.