Mahmut Geldi
11 Јуни 2020•Ажурирај: 13 Јуни 2020
БЕЈРУТ
Во Либан се одржа протест против телевизискиот канал „Њу ТВ" (New TV) на кој спикерот од ерменско потекло, Нешхан Дер Харутиан, упати навреди кон Турција, јавува Агенција Анадолија (АА).
Навредите на Харутиан за време на синоќешна програма емитувана во живо против Турција добија големи реакции во Либан.
Голем број лица, како синоќа, и денес протестираа пред седиштето на „Њу ТВ“ во Бејрут, како и во градот Траблусшам кој се наоѓа во северниот дел Либан.
Демонстрантите извикуваа пароли со поддршка на Османслиската држава, Турција и турскиот претседател Реџеп Таип Ердоган, истакнувајќи дека овој спикер создава раздор во националното единство на Либан преку историјата на братската земја Турција и муслиманите.
Исто така, демонстрантите кои се собраа пред овој телевизиски канал носејќи знамиња на Турција и Либан, побараа да се упати извинување до Турција поради оваа скандалозна изјава.
Бројни млади либанци својата поддршка кон Турција ја искажаа и преку протест со мотоцикли и возила низ градот.
Од друга страна, заменик шефот на турската дипломатија, Јавуз Селим Киран, објави пост на социјалните мрежи во врска со протестот за поддршка за Турција пред „Њу ТВ“.
„Едно очајно лице на телевизиски канал во Либан вчера се обиде да изрази неприфатливи изјави против Турција и нашиот почитуван претседател. Либанскиот народ денес пред истиот телевизиски канал ја изрази потребната реакција против оваа безобразност“, напиша Киран.
Меѓу другото, Мухамед Зијад Кафил, либански адвокат, претходно истакна дека поднел кривична пријава против Дер Харутиан, поради неговата провокативна изјава, нагласувајќи дека тој со своите навредувачки изрази против Турција поттикнувал раздор во националното единство на Либан.
