Кремљ: „На Путин му се допадна форматот на состанокот со Бајден“

МОСКВА

Портпаролот на Кремљ, Дмитри Песков, изјави дека на рускиот претседател Владимир Путин му се допаднал форматот на состанокот кој го имал со американскиот колега Џо Бајден, јавува Агенција Анадолија (АА).

Песков, одговарајќи на прашањата за време на прес-конференцијата во Москва, потсети дека Путин вчера преку видеоконференција разговарал со Бајден.

„Всушност, овој формат овозможува многу искрен разговор. Барем на Путин му се допадна овој формат“, рече Песков, додавајќи: „Двајцата претседатели разговараа за потребата од обединување на руските и американските претставници. Сепак, невозможно е да се одговори на прашањето кога ќе се одржи овој состанок.“

Тој исто така истакна дека не е одреден датум кога претставниците на Русија и на САД ќе разговараат за прашањето за стратешката стабилност во Европа. Песков рече дека двајцата лидери истакнале дека средбата треба да се одржи што е можно поскоро.

Песков ја искоментира и изјавата на Викторија Нуланд, потсекретарката за политички прашања на американскиот Стејт департмент, дека тие се „загрижени поради можноста Русија да се обиде повторно да го создаде Советскиот Сојуз“.

„Нуланд има познавање на руските прашања и на сите детали за територијата на поранешниот Советски Сојуз. Сигурен сум дека Нуланд разбира дека обновување на Советскиот Сојуз е невозможно, исто како и ние и другите експерти“, рече Песков.

Портпаролот на Кремљ зборуваше и за изборот на Олаф Шолц за нов германски канцелар, кој ја замени Ангела Меркел, по 16 години на оваа функција.

„Се надеваме дека ќе има конструктивни односи меѓу претседателот на Русија и новиот премиер. Се надеваме и дека германската страна, како и досега, ќе продолжи да дејствува, сфаќајќи дека нема друга алтернатива освен дијалог за решавање на најтешките разлики, како што беше порано“, рече Песков.