Клучните лидери на ЕУ ќе се приклучат на разговорите Трамп-Зеленски во Вашингтон

ЖЕНЕВА/БЕРЛИН (АА) - Група високи европски лидери ќе отпатува во Вашингтон утре (понеделник) за да се приклучат на разговорите за Украина со американскиот претседател Доналд Трамп и украинскиот претседател Владимир Зеленски, јавува Анадолу.

Францускиот претседател Емануел Макрон, италијанската премиерка Џорџа Мелони, германскиот канцелар Фридрих Мерц, финскиот претседател Александар Стуб и претседателката на Европската комисија Урсула фон дер Лајен изразија подготвеност да присуствуваат на состанокот.

Германската влада соопшти дека патувањето ќе послужи како „размена на информации“ по неодамнешната средба на Трамп со рускиот претседател Владимир Путин на Алјаска.

„Канцеларот Мерц ќе разговара за тековните мировни напори со шефовите на држави и влади и ќе го нагласи интересот на Германија за брз мировен договор“, истакна владиниот портпарол Стефан Корнелиус во соопштение.

Тој додаде дека разговорите ќе се фокусираат на безбедносните гаранции, територијалните прашања, поддршката за одбраната на Украина и одржувањето на притисокот со санкции врз Русија.

Во Хелсинки, финското претседателство го потврди учеството на Стуб на, како што го нарече, „состанокот за мир во Украина“.

Во меѓувреме, Фон дер Лајен на американската платформа за социјални медиуми X објави дека по посетата на Зеленски на Брисел и учеството на конференцијата на Коалицијата на волните, таа ќе отпатува во Вашингтон на барање на Зеленски за да се придружи на разговорите во Белата куќа.

Елисејската палата и италијанската новинска агенција АНСА одделно го потврдија присуството на Макрон и Мелони.

Во петокот, Трамп и Путин имаа тричасовен состанок зад затворени врати, при што рускиот истакна дека дошле за да постигнат „разбирање“.

По состанокот, Трамп рече дека сега зависи од украинскиот претседател Владимир Зеленски и европските лидери.