ЖЕНЕВА (АА) - Канцеларијата за човекови права на Обединетите нации денес ги повика Израел и Иран да ја деескалираат „веќе крајно несигурната“ ситуација по извештаите за израелски напад врз Иран, јавува Анадолу.

„Ги повикуваме сите страни да преземат чекори за деескалација на ситуацијата и ги повикуваме третите држави, особено оние со влијание, да направат сѐ што е во нивна моќ за да се осигурат дека нема дополнително влошување на веќе крајно несигурната ситуација“, изјави на брифинг со новинарите во Женева, портпаролот Џереми Лоренс.

„Се разбира, ние сме длабоко загрижени за потенцијалните трошоци за хуманитарна помош и цената на човековите права доколку оваа ескалација доведе до поширок конфликт на Блискиот Исток“, додаде Лоренс.

Силни експлозии се слушнаа во најмалку два ирански града утринава, при наводи за израелски напад во Иран.

Иранските власти, сепак, ги минимизираа инцидентите и рекоа дека експлозиите во централниот ирански град Исфахан и северозападниот град Табриз биле резултат на иранските системи за противвоздушна одбрана што реагирале на „сомнителни објекти“, како што објавија државните медиуми.

Официјални претставници инсистираа на тоа дека сите воени и нуклеарни објекти лоцирани во и околу градот Исфахан се безбедни и не е предизвикана штета.

Веднаш по извештаите за експлозиите, аеродромските власти на земјата ги прекинаа летовите до градовите Исфахан и Шираз од Техеран.

Летовите подоцна продолжија на Меѓународниот аеродром „Имам Хомеини“ и Меѓународниот аеродром „Мехрабад“, соопшти иранската компанија за аеродроми и воздушна навигација.

Експлозиите во Иран се случија во време на засилени тензии меѓу најголемите непријатели Иран и Израел по саботниот напад на Техеран со стотици проектили и беспилотни летала врз Израел, за кој Иран рече дека е одговор на нападот на 1 април врз иранскиот Конзулат во Сирија.

Израел вети воен одговор за иранскиот напад и покрај тоа што многу западни земји повикаа на воздржаност и деескалација на тензиите.