Mohammad Sıo
30 Јануари 2025•Ажурирај: 30 Јануари 2025
ГАЗА (АА) – Медиумската канцеларија за затвореници, поврзана со Хамас, објави список на 110 палестински затвореници што Израел треба да ги ослободи утре, меѓу кои 32 отслужуваат доживотни казни, 48 со долгорочни казни и 30 малолетници во рамките на договорот за размена на затвореници, јавува Анадолу.
Списокот објавен вечерва, кој го прегледа Анадолу, покажува дека 32 затвореници отслужуваат доживотна казна, 48 се со долгорочни казни, а 30 се малолетници.
Според списокот, 17 палестински затвореници што отслужуваат доживотни казни и тројца затвореници со долгорочни казни ќе бидат депортирани надвор од Палестина.
Претходно, Ебу Обаида, портпарол на вооруженото крило на Хамас, Бригадите Ал Касам, соопшти дека три Израелки – Арбел Јехуд, Агам Бергер и Гади Моше Мозес – ќе бидат ослободени утре.
Кабинетот на израелскиот премиер Бенјамин Нетанјаху вечерва потврди дека го добил списокот на заробеници што утре ќе бидат ослободени од Газа.
Според израелското армиско радио, петмина тајландски државјани и три Израелки, меѓу кои и Јехуд, ќе бидат ослободени утре.
Израел го искористи случајот со Јехуд за да го оправда одложувањето на дозволата раселените Палестинци да се вратат во своите домови во северна Газа од саботата до понеделникот наутро.
Првата шестнеделна фаза од договорот стапи на сила на 19 јануари, прекинувајќи ја геноцидната војна на Израел во која се убиени над 47.300 Палестинци, повеќето жени и деца.
Поради израелските напади како исчезнати се водат најмалку 11.000 луѓе, предизвикани се исклучително разорување и огромна хуманитарна криза.
Седуммина израелски заробеници, меѓу кои четворица војници, досега се ослободени во замена за 290 палестински затвореници откако договорот стапи на сила.
Според првата фаза од договорот, 33 израелски заробеници треба да бидат ослободени во замена за околу 1.700 до 2.000 палестински притвореници.
Во ноември минатата година Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел се соочува и со случај за геноцид пред Меѓународниот суд на правдата за неговите постапки во Газа.
