Ирак: Затворени пет моста поради протестите во Багдад

БАГДАД

Поради антивладините протести во Багдад се затворени пет моста, јавува Anadolu Agency (AA).

Во намерата да се ограничи движењето на демонстрантите, претходно се затворени мостовите „Ал-Џумхурие“, „Синек“ и „Ахрар“.

Денес за возилата и пешаците се затворени и мостовите „Шухеда“ и „Баб ал Муазам“.

На затворените мостови се распоредени и неколку стотици војници.

Дојде и до судири помеѓу демонстрантите кои се обидоа преку мостовите да дојдат до Зелената зона и припадниците на безбедносните сили.

За да се дојде до подрачјето во кое се наоѓаат одредени државни институции во Багдад, потребно е да се премине преку овие мостови. Откако тие се затворени за сообраќај, животот во главниот град е речиси парализиран.

За да дојдат до своите домови или работни места, многу жители мораат да пешачат и по неколку километри.

Антивладините протести и понатаму се во тек на плоштадот „Тахрир“, а од вчера е оневозможен и пристапот до интернет.

Поради тензиите меѓу припадниците на безбедносните сили и демонстрантите, затворени се и две подружници на банки.

Затворени се и влезови и излези во зграда на нафтена компанија чиј сопственик е Владата.

Антивладините протести во Ирак започнаа на почетокот на октомври, а новиот бран протести започна на 25 октомври. Во нередите на улиците досега животот го загубија околу 250 демонстранти, а ранети се неколку илјади.

Високата стапка на невработеност, корупцијата и сѐ потешката безбедносна и економска ситуација се причина за протестите.

Според податоците на Светската банка, Ирак е 12. најкорумпирана земја на светот, а стапката на невработеност на младите изнесува 25 отсто.