Darren Christopher Lyn
19 Декември 2022•Ажурирај: 19 Декември 2022
ХЈУСТОН (АА) - Илон Маск ги изненади корисниците на Твитер со тоа што започна анкета со еден куп прашања за неговата иднина на платформата за социјални медиуми, јавува Агенција Анадолија (АА).
„Дали треба да се повлечам од функцијата извршен директор на Твитер?“, праша тој во објава, барајќи од корисниците да размислат дали треба да остане на чело на компанијата што ја презеде на почетокот на оваа година со договор вреден 44 милијарди долари.
„Ќе се придржувам до резултатите од оваа анкета“, додаде тој.
Маск ја објави анкетата откако призна дека направил грешка со донесувањето нови ограничувања кои забранија споменување на конкурентни веб-страници за социјални медиуми, вклучувајќи ги и долгогодишните страници како Фејсбук и Инстаграм на Мета.
Новите страници како Мастодон, Tрут Соушал, Трајбел, Ностр и Пост беа исто така вклучени на забранетата листа на Маск, според повеќе медиуми, при што корисниците на Твитер повеќе не можат да се поврзат со тие „забранети“ платформи.
Твитер соопшти дека привремено ќе ги суспендира профилите што вклучуваат забранети линкови на веб-страниците во нивниот профил, вклучително и спелување на страници како „Инстаграм-точка-ком“.
Сепак, други мејнстрим сајтови како што се ТикТок, Линкдин и Парлер не беа споменати на црната листа.
Од 21:00 часот источно стандарно време, анкетата генерираше скоро 8,9 милиони одговори.
Одговорите беа различни.
„Глaсајте да се повлече од функцијата“, напиша корисникот @crispylopes.
„На Твитер си му потребен!“, напиша корисникот @cb_doge.
Поради контроверзиите и реакциите околу новите ограничувања на веб-страниците, Маск вети дека нема да прави дополнителни големи промени во политиката додека не ги добие резултатите од онлајн анкетата.
„Се извинувам. Нема да се повтори“, напиша тој на Твитер непосредно пред да ја започне својата 12-часовна анкета.
„Како што вели поговорката, внимавајте што посакувате, можеби ќе го добиете тоа“, додаде тој.
