Илегални израелски доселеници запалија влез на џамија на окупираниот Западен Брег

РАМАЛА (АА) - Илегални израелски доселеници рано утринава го запалија влезот на џамија во селото Дума, јужно од Наблус, на окупираниот Западен Брег, и испишаа графити на хебрејски јазик на нејзините ѕидови, пренесуваат палестински извори, јавува Анадолу.

Активистот Сулејман Давабше изјави за Анадолу дека група доселеници се инфилтрирале во селото пред зори и подметнале пожар во џамијата.

„Жителите брзо го изгаснале пламенот со помош на екипите на палестинската Цивилна заштита, пред огнот да се прошири во внатрешноста на објектот“, додаде тој.

Давабше истакна дека пожарот го оштетил влезот на џамијата, додека чадот се проширил во просторот за молитва, предизвикувајќи оштетувања на внатрешната фасада и на килимите.

Тој додаде дека доселениците испишале пораки на хебрејски јазик на надворешните ѕидови.

Палестинското Министерство за вакаф и верски прашања го осуди нападот, опишувајќи го како дел од зголемениот број обиди за палење џамии на окупираниот Западен Брег за време на муслиманскиот свет месец Рамазан.

Во соопштението, Министерството нагласи дека нападот е „обид за сквернавење на исламските свети места за време на Рамазан“.

Од почетокот на израелскиот геноцид во Газа во 2023 година, нападите на израелските доселеници врз палестинските градови и села на Западниот Брег се интензивираа, при што се убиени 42 Палестинци, според официјалните палестински податоци.

Вкупно, израелските сили и доселеници убија 1.125 Палестинци и ранија околу 11.700 на Западниот Брег, покрај притворањето на околу 22.000 луѓе, покажуваат официјалните палестински податоци.