Израелската државна телевизија: Војската ги заврши подготовките за копнена офанзива во Газа

КУДС/ЕРУСАЛИМ (АА) - Израелската армија ги завршила подготовките за спроведување копнена офанзива во Појасот Газа, пренесува Анадолу.

Израелската државна телевизија КАН објави дека сите активности, вклучително и движењето и позициите на силите, укажуваат на тоа дека армијата е подготвена да влезе во палестинската енклава.

Се истакнува дека влегувањето во Газа ќе ја означи втората фаза од војната по расчистувањето на израелските населби од палестински вооружени лица.

Во саботата, израелската војска соопшти дека ја зголемува својата оперативна подготвеност за следната фаза од војната, во врска со копнената инвазија на Газа.

Конфликтот во Газа, која е под израелско бомбардирање и опсада од 7 октомври, започна кога Хамас ја почна операцијата „Поплава Ал Акса“, ненадеен напад со низа лансирања на ракети и инфилтрирање во Израел преку копно, море и воздух. Хамас наведе дека операцијата е одмазда за упадите во џамијата „Ал Акса“ и зголеменото насилство од страна на еврејските доселеници врз Палестинците.

Потоа израелската војска ја започна операцијата „Железни мечеви“ кон позициите на Хамас во Појасот Газа.

Најмалку 3.478 Палестинци загинаа во израелските напади врз Газа од 7 октомври. Повеќе од 1.400 лица загинаа во нападите врз Израел.