Ikrame Imane Kouachi
15 Ноември 2024•Ажурирај: 19 Ноември 2024
КУДС (ЕРУСАЛИМ) (АА) - Кршејќи го долгогодишното контроверзно табу во израелското општество, Тел Авив денес објави постепено регрутирање на 7.000 ултраортодоксни Евреи во војската, што треба да започне овој викенд, пренесува Анадолу.
Според соопштението на Министерството за одбрана, наредбите за регрутирање ќе се издаваат постепено, почнувајќи од недела, по воените евалуации.
Министерот за одбрана, Израел Кац, планира да одржи разговори со релевантните страни за компромис што ќе помогне во интегрирањето на ултраортодоксните Евреи (Хареди) во војската, истовремено почитувајќи ги нивните верски практики, се додава во соопштението.
Кац нагласи дека армијата ќе вложи максимални напори за да обезбеди средина на поддршка, дозволувајќи им на религиозните Евреи да ги исполнуваат своите воени должности зачувувајќи го својот религиозен начин на живот.
Но, деталите за тоа како ќе се одвива овој процес сè уште се нејасни.
Оваа одлука уследи по пресудата на израелскиот Врховен суд во јуни, која наложи регрутирање на Евреите Хареди заедно со другите израелски граѓани.
И покрај оваа пресуда, ултраортодоксната заедница историски гледано се спротивставува на воената служба, тврдејќи дека нивната должност лежи во проучувањето на Тората за заштита на еврејскиот идентитет на израелскиот народ.
Евреите Хареди во Израел сочинуваат околу 13 отсто од вкупното население на земјата од 9,9 милиони.
Историски гледано, тие се ослободени од задолжителниот воен рок, која е задолжителна за сите Израелци постари од 18 години. Ова ослободување разгорува дебати со децении, за што критичарите тврдат дека го поткопува принципот на еднаквост во службата кон државата.
Регионалните тензии се интензивираа поради тековната офанзива на Израел во Појасот Газа, во која убиени се над 43.700 Палестинци, повеќето жени и деца, од октомври минатата година.
Конфликтот се прелеа и во Либан, каде Израел врши смртоносни напади низ целата земја, што претставува ескалација од едногодишните прекугранични судири помеѓу Израел и Хезболах од почетокот на војната во Газа.
