Mustafa Deveci,Mehmet Nuri Uçar
07 Ноември 2023•Ажурирај: 08 Ноември 2023
АЛ-КУДС (АА) - Израелската Армија објави видеоснимка која наводно прикажува група Палестинци кои се присилени на депортација од северниот дел на блокираниот Појас Газа, јавува Анадолу.
Во соопштението на израелската Армија се тврди дека денеска од 10 до 14 часот повторно е отворен „коридорот за евакуација“ за премин на цивилите од северот на Газа кон југ.
На снимката може да се види како голем број Палестинци во колона се движат со подигнати раце во воздух.
Канцеларијата за медиуми на палестинската Влада во Појасот Газа реагираше на снимката и соопшти дека израелската Армија спроведува психолошка операција и предупреди видеото да не се шири и објавува.
„Окупаторската војска собрала неколку десетици граѓани кои сакале да одат на југ и понижувачки ги фотографираше за да покаже дека многумина одат кон југ“, се вели во соопштението.
Поради уништувањето на голем дел од сообраќајниците во нападите што израелската Армија ги врши од 7 октомври, на цивилите кои живеат во северниот дел на Појасот Газа им е отежнат патот кон југ.
Околу два километри од патот на коридорот, за кој се тврди дека е отворен за евакуација, се тешко оштетени поради израелските напади, што го оневозможува поминувањето на возилата.
Бидејќи патот на коридорот стана неупотреблив за време на израелските напади, цивилите кои сакаат да преминат од северниот кон јужниот дел од Газа мора да го поминат пеш. За постарите, жените и децата кои мораат да ги напуштат домовите поради нападите, ова патување станува уште потешко бидејќи мора да пешачат.
Се вели дека околу 400.000 палестински цивили се наоѓаат во северниот дел на Газа, што Израел го прогласи дека е под опсада.
Според палестински извори, 70 отсто од населението во Појасот Газа, каде што живеат приближно 2,3 милиони Палестинци, се раселени поради израелските напади од 7 октомври.
