Израел и САД се подготвуваат за евентуален неуспех на преговорите со Иран

ЕРУСАЛИМ (АА) – Израел и Соединетите Американски Држави (САД) се подготвуваат за сценарио во случај тековните преговори со Иран да не успеат, со интензивирање на воената соработка изминатите неколку дена, јавија израелските медиуми, пренесува Анадолу.

Канал 12 извести дека САД го засилуваат своето воено присуство на Блискиот Исток, со цел да го зголемат одвраќањето или да се подготват за евентуални идни воени операции. Според медиумот, интензивирани се контактите на високото ниво помеѓу израелските и американските високи претставници, во контекст на зајакнување на воената соработка во случај преговорите да не резултираат со договор.

Како што објави Канал 12, зголемувањето на воените трупи на САД во регионот Израел го толкува или како обид за создавање „слика на победа” или како подготовка за серија воени операции што би можеле да го преобликуваат регионалниот баланс на моќ.

Исто така, се вели дека меѓу САД и Израел постојат несогласувања во поглед на потенцијални напади врз иранската инфраструктура, при што Израел поддржува ваков тип акција, а Вашингтон се противи. Високи израелски претставници истакнуваат дека постои разидување меѓу Тел Авив и Вашингтон во однос на природата на евентуалните напади.

Во меѓувреме, Иран ја доведува во прашање искреноста на САД во преговорите и нема доверба во Вашингтон, се додава во објавата, каде што се наведува дека токму поради овие причини Техеран сѐ уште нема одговорено на американските барања. Исто така, се тврди дека Иран се стреми во процесот да ги вклучи и земјите од Персискиот Залив, Кина и Русија.

Регионалната ескалација се зголеми откако започна заедничката американско-израелска офанзива врз Иран на 28 февруари, во која до денес се убиени над 1.340 лица, меѓу кои и тогашниот врховен лидер ајатолахот Али Хамнеи.

Техеран возврати со напади со беспилотни летала и ракети насочени кон Израел, Јордан, Иран и земјите од Персискиот Залив каде што се наоѓаат американски воени бази, предизвикувајќи жртви и штета на инфраструктурата, истовремено нарушувајќи ги глобалните пазари и авиосообраќајот.