Asiye Latife Yılmaz
11 Декември 2025•Ажурирај: 11 Декември 2025
ИСТАНБУЛ (АА) – Администрацијата на Трамп предложила обновување на руските енергетски текови како дел од поширок план за реконструкција на Украина и повторна интеграција на Русија во глобалната економија, објави вчера весникот „Вол стрит џурнал“, јавува Анадолу.
Според наводите, плановите биле наведени во прилози додадени на мировните предлози што биле споделени со европските партнери последниве недели.
Предлозите предвидуваат американските компании да добијат пристап до околу 200 милијарди долари од замрзнатите руски државни средства за финансирање проекти во Украина, меѓу кои и голем центар за податоци што би се напојувал со електрична енергија од нуклеарната централа Запорожје, која се наоѓа под руска контрола.
Рамката, исто така, предвидува американски компании да може да влезат во клучни руски сектори, вклучително и рударството на ретки минерали и експлоатацијата на арктичката нафта, како и повторно отворање на руските енергетски испораки кон Западна Европа и светските пазари.
Некои европски официјални претставници што ги разгледале документите изразиле скептицизам околу сериозноста на предлозите, при што еден од нив ги споредил со претходниот предлог на американскиот претседател Доналд Трамп за претворање на Газа во одморалиште во „Ривиера стил“.
Друг европски официјален претставник го споредил предложениот договор меѓу САД и Русија за енергија со економски „дил од типот на Јалта“.
Во извештајот се додава дека европските претставници сакаат да ги искористат замрзнатите руски средства во Европа за да ѝ зајмат пари на Украина за основно оружје и владини операции.
Според нив, американскиот план ризикува да ја маргинализира европската стратегија за поддршка на Украина и задржување на Русија во економска изолација, што предизвикало забрзани консултации во европските метрополи за да се дејствува пред Вашингтон да ги постави условите.
Американски претставници тврдат дека европскиот пристап би ги исцрпил замрзнатите руски средства, додека американскиот модел би ангажирал големи финансиски институции од САД за да го зголемат фондот, со можност да достигне до околу 800 милијарди долари.
