Зеленски тврди дека фатиле кинески државјани кои се бореле заедно со руските сили во источна Украина

ИСТАНБУЛ (АА) - Украинскиот претседател Владимир Зеленски денес потврди дека уапсиле двајца кинески државјани кои се бореле заедно со руските сили во источниот регион Доњецк, истакнувајќи дека инволвирањето на Кина е јасен сигнал дека претседателот Владимир Путин не сака да ја заврши војната, известува Анадолу.

„Нашата војска фати двајца кинески државјани кои учествуваа како дел од руската Армија. Ова се случи на украинска територија – во Доњецк. Кај нив беа пронајдени лични документи, банкарски картички и други податоци за идентификација“, соопшти Зеленски.

Тој рече дека Киев има информации дека има повеќе кинески државјани во руските воени единици, при што во тек е проверка.

„Му наложив на министерот за надворешни работи на Украина веднаш да стапи во контакт со Пекинг и да разјасни како Кина има намера да одговори на ова“, додаде Зеленски.

„Ова е јасен сигнал дека Путин не сака крај на војната. Тој бара начини да ја продолжи. Ова бара одговор – од САД, од Европа и од сите кои се залагаат за мир“, додаде украинскиот претседател.

Тој рече дека кинеските државјани се наоѓаат во притвор на Службата за безбедност на Украина, а истрагата и оперативните активности се во тек.

Досега нема официјален коментар од Русија и Кина во врска со случајот.

Кина повеќепати повика на дипломатско решение за тригодишната војна во Украина, притоа пофалувајќи ги напорите на Русија за дијалог со САД.

Претседателите на Кина и Русија, Си Ѓинпинг и Владимир Путин, неколку дена пред почетокот на војната во 2022 година прогласија „неограничено“ стратешко партнерство.