свет

ЕУ одобри 230 милиони евра за помош во борбата против ширењето на коронавирусот

„ЕУ го одобри пакетот со помош за борбата против ширењето на коронавирусот во износ од 230 милиони евра“, изјави Ленарчиќ и додаде дека дел од средствата ќе бидат проследени на СЗО, а дел за истражувањата што ги спроведуваат членките

Şerife Çetin  | 24.02.2020 - Обновена : 25.02.2020
ЕУ одобри 230 милиони евра за помош во борбата против ширењето на коронавирусот

БРИСЕЛ (АА) - Европската Унија (ЕУ) одобри 230 милиони евра за помош при борбата против ширењето на опасниот коронавирус, јавува Агенција Анадолија (АА).

Комесарот на Европската Унија за управување со кризи, Јанез Ленарчиќ, и комесарката за здравство и безбедност на храна, Стела Киријакидес, одржаа прес-конференција на која новинарите во Брисел ги информираа за ширењето на коронавирусот во светот.

Ленарчиќ изјави дека случаи на заразување со коронавирусот се потврдени во 29 земји и дека станува збор за вирус од чии последици починале речиси 2.600 заразени лица.

Тој изјави дека сега на сите им е јасно колку правилен бил апелот што ЕУ минатата недела го упати до членките, за преземање мерки против ширењето на тој вирус.

„Членките на ЕУ треба да дејствуваат координирано и единствено. Нема повеќе сомнеж во тоа дека Ковид-19 претставува глобален проблем. Целиот свет мора да соработува“, изјави Ленарчиќ.

Истакнувајќи дека властите на Италија брзо реагирале по појавата на коронавирусот во земјата, Ленарчиќ изјави дека Италија има сигурна инфраструктура и има искуство на тоа поле.

„ЕУ го одобри пакетот со помош за борбата против ширењето на коронавирусот во износ од 230 милиони евра“, изјави Ленарчиќ и додаде дека дел од средствата ќе бидат проследени на Светската здравствена организација (СЗО), а дел за истражувањата што ги спроведуваат членките.

На прашањето дали повторно ќе бидат воспоставени граничните контроли во земјите на Шенген-зоната, Ленарчиќ изјави дека за тоа ќе одлучуваат членките на таа зона.

Комесарката Киријакидес изјави дека вирусите не познаваат никакви граници, а дека приоритетна задача на секоја власт е да ги заштити своите граѓани.

Истакнувајќи дека раководството на Европската Унија ќе биде во контакт со властите на Италија, Киријакидес изјави дека Европската комисија е подготвена да ѝ помогне на секоја членка каде што ќе се појави коронавирусот.

„Неопходно е да не дозволиме ширење паника и дезинформации. Треба да дејствуваме единствено, координирано и усогласено“, порача Киријакидес.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.
Поврзани теми
Bu haberi paylaşın