ЕУ на Украина досега ѝ обезбеди поддршка од вкупно 108 милијарди евра

БРИСЕЛ (АА) - Од почетокот на војната со Русија, Европската Унија (ЕУ) ѝ обезбеди на Украина финансиска, хуманитарна и воена поддршка во вкупен износ од 108 милијарди евра, јавува Анадолу.

Претседателката на Европската комисија, Урсула фон дер Лајен, сподели објава на својот профил на социјалната мрежа X за поддршката што ЕУ и земјите-членки ѝ ја дадоа на Украина од почетокот на војната.

Нагласувајќи дека ЕУ е на страната на Украина од првиот ден на војната, Фон дер Лајен рече: „Како ЕУ и земји членки обезбедивме приближно 108 милијарди евра поддршка за Украина.“

Фон дер Лајен изјави дека Украина ќе излезе од војната како победник и рече: „ЕУ ќе продолжи да биде со Украина и нејзиниот народ сѐ додека е потребно.“

Според податоците на ЕУ, од речиси 108 милијарди евра помош што Унијата и нејзините земји членки ѝ ја дадоа на Украина од почетокот на војната, 52 милијарди евра беа финансиска, фискална и хуманитарна поддршка, а 39 милијарди евра беа во вид воена помош. За Украинците кои се засолниле во земјите на ЕУ се потрошени 17 милијарди евра.